was du schon immer über Chrisi Le Qü lesen wolltest
  Startseite
  Archiv
  Über...
  Unter...
  Links...
  Rechts...
  Gästebuch
  Abonnieren
 


 

http://myblog.de/le-q

Gratis bloggen bei
myblog.de





Links
  es Heer vo Smileys
  yäni - °+mis gstuss+°
  Nettlä
  LeHonk - die Welt entdecken
 
Schnee u Gstürm

Wie verpackt me 2 Wuchenänd i eis? Ganz eifach: Seriell schaute. Vomene Tanz uf zwe Hochzite u verschiedene Lüt handlet dä churz Bitrag. Natürlech isch das e verlägnige Versuech, mim Blog wieder chli Läbe izhuuche...

Achtung: Dä Bitrag chönnt de echli lenger wärde...


Mäntig Abe spät, 27. Februar: No so nachem Training hani scho mau ufem Natel gseh, dass mi irgend sone komischi Nummere het wöue. Combox - dr Hamschter, üse Kurs-Oberleiter. So vo wäge Höck am Fritig z Bieu. Wüu die Nummere geng bsetzt isch gsi, hanim de versuecht ufds Natel azlüte. Isch gar nid so eifach, we ufdr Adrässlischte nume e 075er-Nummere steit... Dass die fautsch isch, hani de gli mau usegfunge. Item, lütemer ihm mau hei a, u wie die Schiggse heisst woni usem Näscht glüte ha weiss i ou nid. Jedefaus hanine de erreicht (wosch no grad am Dimitri hallo säge?" - "Hallo Dimitri!"), u är het mer speter zrüggglüte. Ir Zwüschezit isch mer i Sinn cho, dass är mir ufdr Combox het verzeut, i söu diräkt d Fiori frage, wo si genau wohni. Machemer doch das, u zum Glück het si ou es Natel, süsch hätti wou ihri eutere zum Näscht us glütet. Si wohnt itz schliesslech ir Autstadt ire WG. Ire Hammer-WG, muess me säge.
Mittwuch, 1. März: Es SMS a K. "Hey Kay, bisch du itz drbi am Fr Abe z Bieu? wie wärs, wemer üs mau Gedanke zumene Menü mache? LG Q" KLar doch, Donnschtig Morge am Nüni z Bärn. I ha di ou gärn =)

Item, am Donnschtig Mittag bini de ufgstange, tuusig mau sorry, item, es Chicken Curry müessemer ja nid gross plane. Aber um das wärs ou nid gange

Fritig Mittag, 3.März: Nach dr Schueu schnäu hei, packe. Us schnäu isch 3 u meh worde, so dass i ds Gfüeu ha gha, lömer das mitem no churz is Büro ga hallo säge. No meh packe, aus wome für zwöi Wuchenänd brucht. U Mamis Päckli, woni de mau muess abliefere. U de ab is Outo, richtig Schönbüeu.
Aus, wome brucht? zwöi paar Schue, si hei nasses Wätter gmäudet. E Schirm hani immer im Outo, dr Huet, dr Schlafsack, ... Ah ja, e dichti Jagge wär no guet gsi, statt nume e Fäsu. Henu.
Auso, ab i Lade, ichoufe was me ou immer irgendwie ines Curryriis mit Frücht u Pule cha inegheie (zum Glück gits dr Dimitri, es wär schad gsi um au die feine Sache...
De mau dr K ufgablet, u ab geits düre Strömend Räge uf Bieu. U afe mau dr MP3-Player richtig isteue: hello hello.... hello hello... unos - dos - tres - catorze!
Bieu. Wo simer? Hie, nimm mau das Plänli. U was mache die da vore ufdr Chrützig, heieiei? Aha, Uffahrunfau. Jänu, witer, da vorne geits de mau linggs - eh, rächts, was hie?, ja!, ok, u itz müesstemer doch irgendwo... das isch die Kurve da... Mir si diräkt vorem Huus düre gfahre, meh uf dr Suechi nachemne Parkplatz, u de no zwöimau vor düre gloffe bis mers gfunge hei.
Dummerwys hei di angere ihre Höck ir Chuchi gmacht, so heimer nid ungstört chöne zoubere... Aber glunge isch üs die Sach mau wieder, Säubschtlob hin oder här, K&Q rocke die Töpf eifach mau für mau. Sogar ohni Musig.

När het sech dr K leider wieder müesse verabschiede u het mi elei gla mit au dene frömde Lüt... Si hei de no ghöcket, u ghöcket, u i no chli Weltwoche gläse, u irgendeinisch hets de gheisse, mir gö itz is Pfadiheim vo Jura-Bieu. Cool, wo isch das? OK, i fahre dr nache. Auso zum Glück, muess me säge, wüu d Fiori isch im Züg ume graset, i hätt mi scho lang verloffe gha...
Auso: Pfadiheim Jura-Bieu, Fritig Abe sehr-spät. Drbi si: Dr Hamschter, üse Boss; dr Dimitri, dä mit de wenigschte Haar; dr Nauta, dä mit de meischte Haar; d Nuvola, üsi Vizebossin; dr Logo, dä vo Thun gloub; d Fiori, üses Jüngschte im Umzug. U i. Gschichtli verzeue, Chüssischlacht, blödi Spieli à la Chüe zeue ufdr Weid u Meiere mit eim Würfu. U de mau us au dene Sofas u Matrazene es paa Gliger häresteue. Zwüschedüre no e Bütschee-Miuchschnitte, für aui. Ou füre Dimitri, das het me müesse fötele. U de mau schlafe. Stömer am haubi nüni uf?

Samstig Morge, 4. März, sibni: Wäm sini Uhr pipset da? Sorry zäme. Dr Choch gieng itz ga früschi Gipfeli bache...
E Stung speter simer de mau uf, zmörgele, käfele, u am nüni use. Es het gschiffet. Mir gö z Fuess i Waud. I ha no d Turnschueh an. Im Waud hets Schnee. Mini Füess wärde nass, u dr Dimitri liidet mit mir. U irgendwo hie sötts de es Biwak gä...

Gömer zrügg, u äbe, mir gö mit eim Outo, irgendwo steit da im Quartier e grosse Chrysler, womer aui 7 Platz hei. I ha d Schue, aber nid d Socke, vorhär no gwächslet. Fiori, los geits!
Ab uf Predorwää, ines Naturfründehuus. Is gliche, woni letscht Summer scho kochet ha. Juhuii, düre Töifschnee näb dr Pischte ufe, wüu dr Wäg vou zuegschneit isch! Das isch ja no eis; dr gfrohrnig Matsch ufem schmale Strässli vo Orvin ufe isch de ds angere gsi. Grad denn, wo ds Poschi isch entgäge cho u dä schwär Chrysler nüm vorwärts u ou nid rächt rückwärts het wöue, het mer üsi Schoffööse afa leid tue...
Im Huus heimer sofort aus müesse aluege, wiemes so macht; statt d Azau Näschter pro Zimmer het mi viu meh dr Inhaut vo aune Chuchischäftli u Schubladene intressiert. Mit öppe 100 Föteli hani das aus fiin süberlech füre K dokumäntiert.
Am haubi eis heimers gseh gha; weimer itz no id Beiz, oder gömer gschider scho uf Lesemibua übere, de simer emu de dert? Ja, los, gömer. Zum Glück heimer üs so entschiede. Mir hei zwar dr Wäg guet gfunge, aber unger dene Bedingige fahre nid emau ig gärn. Ds Les Emibois simer de grad schnuerstraks zum Huus, ou echli düre Töifschnee, ud Vermieterin het scho gwartet. Oh Schreck, mir si da so öppis vo zmitts im Jura, da mues me sogar ds Kafi uf franz bsteue! U "Aïe!" säge, weme dr Gring aschlaht! Ou die Chuchi isch dr Hammer, schad, simer nume e haubi Wuche dert. När geits ab id Beiz, echli ga höcke, vor auem übere Lagerpakt... "Was, du rouchsch?" Hmm, ja, chunnt vor. "Aber bisch nid Chetteroucher?" Hmm, weni Zit ha, rouchi ou Chöttine. Aber die Zit wird mer de wou fähle Jedefaus si die Lüt zum Teil nid so gmerkig, oder si am Morge bim Waudspaziergang, am Abe vorhär bim Outo hole etc. mit de Gedanke nid drbi gsi. Egau, was usem Lagerpakt wird, entscheide d TN, mir setze eifach Mindescht-Standards.
Während däm Hamschter, Nauta u Logo no si öppis ga recke (düre Töifschnee, wo mittlerwile ou usem Himu isch cho), heimir no chli am rote Fade witergspunne. Pünktlech am haubi sächsi (ds Café isch am füfi zue, u mir si zum Bahnhof ga warte) si die drü Herre zrügg gsi, u mir si wieder Bieu-wärts, u uf dr Heimfahrt heimer de öppe aus nomau i Frag gsteut, womer am rote fade gänderet hei...
Z Bieu no chli im Heim umegirrt, de hani mi de mau verabschiedet. Paar hei de ou no grad a Bahnhof müesse. Nauta, Dimitri u Logo heisech auso i mi Siuberpfiiu quetscht u los geits. Dr Bahnhof finge isch eis, se irgendwo im Parkhuus usela ou, das ganze innert ere Viertustung ke Sach, aber hueresiech sone Schneesturm wär nid nötig gsi! Item, Fröide herrscht, woni die Herre pünktlech ha chönne losla. Itz heimer da no e Speziauuftrag vo mire Muetter im Outo, wo uf Ipsach muess, das isch doch irgendwo chli meh rächts auses heizue gieng... Gfunge, aglüte, la lotse, abglieferet, paar Wort gwächslet, wieder use, ds Outo abbäselet, u witer geits. Über Land oder über d Outobahn? Isch öppe beidne Orte glich schnäu, oder glich langsam, bi däm Schnee, aber d Outobahn het weniger Kurve...
Auso, irgendwo bi Brügg geit me ufd Outostrass, es isch haubi achti. Mir gäbe mau am Z e Funk, es chönnt echli speter wärde... Viu speter, wüu dass die vor mir nid schneuer aus 40 fahre, chane irgendwie niemer übu nä. Lueg säuber!



I weiss, d Biudqualität isch nid überragend. Aber bi 20cm Schnee uf dr Fahrbahn, Sichtwiti unger 50 Meter u nacheme länge Tag hani nid no möge d Kamera füresueche... Jedefaus isches nach Lyss, uf dr zwöispurige Bahn, echli beser worde. Zersch hei paar mit 45 überhout, när mit 50, de mau mit 60... u irgendwenn ds Schüpfe simer so säubschtsicher gsi, dass mer glich wieder mit 70 oder so si gfahre. Es geit ja gradus, u weme früech gnue blinket u Spur wächslet, geit das scho. Isch emu gange.



Isch doch schön, oder?
Z Schönbüeu nach dr Outobahn isches de chli weniger schön gsi. Aber i bi unfaufrei uf Graferied cho, grad rächtzitig zum Znacht im KGH.
Aus witere zu däm Abe fingt me i yänis Blog , i ma grad nüm u ha Hunger Jedefaus si us dene zwöi Wuchenänd eis worde, trotz Schneesturm u nasse Socke, trotz Stromusfau u viu Gstürm a viune Höcke. U itz, woni wiess wie cool die Chuchine si, fröji mi no viu meh ufe Kurs. Natürlech hani am K aui Föteli uf CD brönnt, scho grad am Samstig Abe. Schliesslech hani nume für das die ganzi Zit dr Läptop drbi gha! *nicksmäilimach* U was hani scho wieder ufd CD gschribe? Irgendöppis à la "Da real FTA certified kitchen toolz in da Bélierhood" oder so. U was FTA heisst, isch e angeri Gschicht u söu es angers Mau vrzeut wärde.
Vilech gschider ersch nach Oschtere...
16.3.06 04:21
 


Werbung


bisher 7 Kommentar(e)     TrackBack-URL


*yäni* @simplex :) / Website (16.3.06 08:23)
Schliesslech hani nume für das die ganzi Zit dr Läptop drbi gha! *nicksmäilimach*

natüüüüürläch abr diä fötäli heschmr ja nid chönnä zeigä! tsö. du.. dsch abr scho chlei schwach, eifach aus uf mi blog abzschiäbä *g* de hei ja d'läsr gar ke müglächkeit chlei objektivität übr ds ganzä z'erlangä


Chrisi Le Qü (16.3.06 11:33)
Hmm, ke Ahnig, werum i am 3 no ha wöue afa blogge. Aber am haubi füfi hani emu wöue ufhöre

P.S.: Guete Morge.


*yäni* @simplex :) / Website (16.3.06 16:09)
tja, so chas gah.. i wott no übärä schiitag *g* abr nur churz^^ eifach d'friiidaaa isch wichtig und viläch no übr "yaeni – die suche geht weiter" ;P (www.yaeni.com)

ps: haha.. seeehr witzig ;P


Chrisi Le Qü (16.3.06 22:19)
U was no d Föteli ageit: Werum zur Höu wosch du wüsse, was i welere Schublade isch? Da isch rein gar nüt intressant, u ds Föteli vom Dimitri ou nid.

Aber churz, gäu!

p.s.: Gäu he!


*yäni* / Website (16.3.06 22:43)
was schubladä!? tscheggänä nid^^

muäschäs ja nid läsä, wedä nid wosch ;P

ps: s'git äbä teu, di schaffä no u stöh früäch uff für ds gäut!


Chrisi Le Qü (16.3.06 22:50)
D Föteli woni am K ha gä, si nume vo Schubladene u Schäftli gsi. Muesch haut läse...

Gits no irgend öppis zwüsche "wöue" u "müesse"?

p.s.: Es git ou settigi, wo d Füehrig düd Schoggi frey Fabrigg aus Arbeitszit dörfe ufschribe... Sövu Buuchweh het mer schaffe no nie gä


*yäni* / Website (16.3.06 23:05)
jä soo DIÄ fötäli =) ha dänkt, de chöngi nomau di eggänä u kantä vrfluächä vo denn ;D odr hesch diä nümm gfötälät?

jepp, dörfä. isch nid ganz zwüsch drin abr isch ou ä aspäkt ;P

ps: heschdr oscho mau gedankä gmacht, vo wo dass ds wort "schööögäälä" chunnt?

Name:
Email:
Website:
E-Mail bei weiteren Kommentaren
Informationen speichern (Cookie)



 Smileys einfügen



Verantwortlich für die Inhalte ist der Autor. Dein kostenloses Blog bei myblog.de! Datenschutzerklärung
Werbung